Avhandlinga har tittelen ”Reorganising the workplace: Factors that affect implementation of broad participation” og tar for seg innføring av brei medverknad av tilsette og fagforeiningsleiarar i bedriftsutvikling. Avhandlinga er basert på eit langsiktig forskingsarbeid i, med og for ei gruppe industribedrifter i Sogn og Fjordane.

Eit funn er at klubben kan spele ei viktig rolle for å fremje brei medverknad i bedriftene, føresett at klubben har leiinga med på laget for at medverknaden skal bli reell. Leiarane må invitere medarbeidarane med i endringsprosessar: Leiarane sin vilje til å lage møteplassar med dei tilsette og sjølve delta i dialogen på desse møteplassane er nøkkelen til å få til brei medverknad.

Hovudfunnet i avhandlinga er at den historiske, levande møteplassen mellom eigarar og tilsette på fabrikkgolvet er viktig. Denne uformelle samhandlinga på ”golvet” i bedriftene er basisen for at dei tilsette skal kunne medverke i avgjerdsprosessane i selskapa. Då bedriftene vart etablerte, vart det samstundes etablert direkte medverknad mellom tilsett og leiar/eigar. Bedriftene vaks, vart byråkratiserte, og mykje av denne direkte medverknaden forsvann.

Forskinga avdekkar eit sterkt ønskje hjå tilsette og leiarar i bedriftene til å gjenskape denne direkte medverknaden. Gjennom eit konkret endringsprosjekt i ei av bedriftene har det lukkast å lage ein ny møteplass ”på golvet”, ein møteplass som vert brukt aktivt til å praktisere brei medverknad i den daglege drifta og utviklinga av selskapet. I ei anna bedrift vart det også prøvd å gjenskape ein slik møteplass, men forsøket førte ikkje fram. Erfaringar er at for å lukkast i endringsprosessar, er det viktig at det vert teke omsyn til lokale tilhøve og lokale tradisjonar, noko som ikkje alltid er tilfelle om ein slavisk følgjer malen gitt i den norske samarbeidsmodellen. Faktorar som spelar inn for å kunne etablere brei medverknad er leiarane/eigarane sitt syn på makt, tilsette/fagforeiningar sin strategi når det gjeld medverknad, den organisatoriske historia og nærveret av møteplassar i bedriftene, særleg den levande møteplassen ”på golvet”.

Strand har arbeidd som forskar ved Vestlandsforsking i Sogndal sidan 1998 og arbeidde tidlegare som IT-leiar ved Sogn og Fjordane Energiverk på Sandane 1988-1998 og som prosjektingeniør ved Kongsberg Våpenfabrikk 1984-1988. Han har mastergrad i samfunnsplanlegging frå Høgskulen i Volda  og er høgskuleingeniør i kybernetikk frå Rogaland Distriktshøgskole i Stavanger. Strand er gift og har fire born.

Den elektroniske versjonen av avhandlinga er tilgjengeleg her.